Урлаг амьдралын талх биш нь тодорхой. Гэхдээ яах арга аргагүй дарс нь мөн.

*        *        *

Аугаа их хүмүүсийн тэмдэглэлийг тэгтлээ хорхойсон уншдагийн маань нэг шалтгаан бол бидний биеэ тоох үзэл. Алдартай хүнтэй санал бодол, мэдрэмж, зуршил, үгүй ядахнаа сул талуудаараа адил төстэй байх юм бол бид баясдаг. Уг нь хэн ч биш хүмүүс өөрсдийнхөө тухай бичиж үлдээдэг сэн бол, бид тэдэнтэй л олон талаараа адилхан байх сан.

*        *        *

Уран зохиолгүй шинжлэх ухаан загварчлагдсан болхи бүдүүлэг байдаг. Аливаа урлагийн мөн чанар нь мэдлэг тул шинжлэх ухаангүй уран зохиол хоосон болдог.

*        *        *

Уншсан хүн “Би ч үүнийг биччих л байж” хэмээн бодож байвал, тэр сайн ном. Байгалийн сайхан нь бүхэнд хүртээмжтэй, энгийндээ байдаг.

*        *        *

Хүний сэтгэлийг хөдөлгөж эс чадваас

Хөнгөн бийрийг хөшиж юу хийнэ.

*        *        *

Урьдаар зөв хүмүүжлийг ол. Дараа нь мэргэн ухаанд суралц. Эхнийх нь үгүй бол сүүлчийнхэд нь хүрэх хэцүү.

*        *        *

Өөртөө ч, бусдад ч ямагт үнэн хандана гэдэг аугаа их авьяасын шинж.

*        *        *

Амьд бүтэлгүйтэл үхмэл сор туурвилаас дээр.

*        *        *

Зохиолч бидэнд шүүмжлүүлэх юу ч биш. Бидний тухай хашгирч байхын төлөө л бид амьдарч яваа юм. Чимээгүй байх л биднийг ална.

*        *        *

Сонгодог зохиолчдын аз болоход, тэд цөм талийгаач болжээ. Тэд цөм талийгаач болцгоосон нь бидний ч бас аз юм.

*        *        *

Хуучин цагт байгаль нь өгөөжтэй орнууд хамгийн баян байлаа. Өнөө үед хүн нь илүү бүтээлч улс орнууд хамгаас баян ажээ.

*        *        *

Үнэхээр зүтгэлтэй хүн замд гаруутаа л өмнөө буй асар их ажлыг олж хардаг. Тэрээр хийх юм олдохгүй байна гэж гомдоллодоггүй, харин ямагт ямар нэгэн зүйлийг амжуулж явдаг.

*        *        *

Дэмий сууж, наргиж цэнгэх нь бүдүүлэг харанхуйн шинж мөнөөс гадна элдэв өвчний үүдэл болдог.

*        *        *

Өдөр тутмын хөдөлмөрт дассан хүмүүс хичнээн сул дорой, өтөл хөгшин байсан ч ажил хийж сураагүй хүч чадалтай залуусаас илүү амьдрах чадвар сайтай.

*        *        *

Ажил биднийг уйтгар, дутагдал, хэрэгцээ хэмээх гурван лут гайнаас ангижруулдаг.

*        *        *

Хүний санаа хичнээн ч ариун дээд байлаа гэсэн, сайн сайхан санаандаа биш үйл хэрэгтээ л хүн жинхэнээсээ оршдог.

*        *        *

Хийж гүйцэтгээгүй байхад хичнээн олон ажил огт боломжгүй санагдаж байлаа даа!

*        *        *

Хэрэв чи харгис хатуу байж чаддаг бол ажиллаж чадна.

*        *        *

Ямар ч ажлыг эхлэх л хамгаас хэцүү.

*        *        *

Хэцүү бэрхшээл агуулаагүй, ухаанаа дайчлахыг шаардаагүй ажил хүнд тэнцэхгүй.

*        *        *

Ямар ч ажлыг хийхэд тэгтлээ их хүч чадал шаардагддаггүй. Харин чухам юуг хийх хэрэгтэй вэ гэдгээ мэдэж шийдэхэд үү? Тэгэхэд л үнэхээр асар их хүч шаардлагатай болдог юм даа.

*        *        *

Бусад хүн таныг хийж чадахгүй гэж бодож байсан тэр зүйлийг хийчих нь хамгийн дээд зэргийн таашаал мөн.

*        *        *

Агуу их үйлсийг амлалгүйгээр бүтээдэг.

*        *        *

Хүлээж чаддаг хүний гарт цагаа болоход бүх зүйл ороод ирдэг.

*        *        *

Үйлс хэдий өчүүхэн боловч, эс үүсгэвээс үл бүтмой.