“Дуурьсах” хэмээх энэ үгийг “нэр нь алдарших, олноор магтан хэлэлцэх, яруу тунгалаг сонстох, дууриан цуурай гаргах” гэсэн утгатай үг хэмээн ШУА-ийн Хэл зохиолын хүрээлэнгийн бүтээл “Монгол хэлний дэлгэрэнгүй тайлбар толь”-д тайлбарлажээ. Я.Цэвэлийн “Монгол хэлний товч тайлбар толь”, Чой.Лувсанжав нарын “Монгол бичгийн хадмал толь” зэрэгт “дуурьсах”, харин Ц.Дамдинсүрэн, Б.Осор нарын “Монгол үсгийн дүрмийн толь”-д “дуурсах” гэж байх ажээ.

“Дуурсах” бус “дуурьсах” нь зөв гээд байгаагийн учрыг монгол бичгийн бичлэгийн хэлбэрээс нь төвөггүй мэдэж болно. Монгол бичгээр “дагурисаху” гэж бичдэг. Энэ үг нь дуу чимээний “дуу”-гаас гаралтай бөгөөд хөгжмийн бүтээлийн нэгэн төрөл дуурийг ч монгол бичгээр “дагури” хэмээн бичих ба дуурьсах гэсэн үгтэй утгын холбоотой билээ.